ŠOOP ŠOOP Duogaš
Šoop Šoop – Sámi Design Days leat vuosttaš ámmátlaš sámi designmeassut mat lágiduvvojit Norggas. Dat šaddet ođđa arenan ja deaivvadanbáikin designeriidda, buvttadeddjiide, árbevirolaš duojáriidda ja ostiide miehtá riikka, gasku Sámi stuorámus gávpoga, Romssa. Sámi designabeivviid ulbmilin lea čalmmustahttit sihke smávit ja stuorebuš designaaktevrraid ja buvttadeddjiid Norggas, oažžun dihtii sin buktagiid olámuddui bivttasgávppiide, stohpogálvogávppiide, galleriijaide, museaide ja muđui.
Go ovddida dan, mo sámi designa lea oidnosis maiddái árbevirolaš turismamárkaniid olggobealde, de čájehit sámi designabeaivvit sámi identitehtaovdanbuktimiid máŋggabealatvuođa stoahkkás ja urbána birrasis seammás go gudnejahttet árbevirolaš kultuvrra ja identitehta. Designabeivviid áigge beassá oaidnit buoremus sámi designaid biktasiin, čiŋain ja viessogálvvuin. Doppe lea maiddái čuovvovaš áigodaga buvttaalmmuhančájáhus ostiid várás, ja vejolašvuohta báikkálaš álbmogii oastit buktagiid mat eai leat ovdal leamaš olámuttus Romssas.
Dát galgá doaibmat arenan buvttadeddjiide gos besset čájehit iežaset buktagiid dakkár márkaniin gos olahit viidábut go báikkálaš márkaniidda gosa eatnašat vuvdet iežaset gálvvuid. Ulbmilin lea maiddái Sámi olggobeallái čájehit ahte sámi buktagat leat maiddái eará go dušše gávttit ja niibbit. Kundarat leat vuordán dákkára guhká, gos besset gávppašit sámi buktagiid eará sajiin go turistagávppiin gos sámi buktagat vuvdojuvvojit seamma sajis go juovlastálut ja stálut.
Designameassu barggaheaddjin lea Sámediggi, muhto teknihkalaš lágideaddjin leat fitnodagat Kreativ Industri ja Árvu.
